هبوط اضطراري !

أجمل ما فيكى .. نظرتك

لما شعاع الشمس يعكس فوق جبينك رقتك

واما عيونك تبتسم

أو يترسم ضحكه بريئه ع الخدود

طعم السعادة لما اشوفها .. ملوش حدود

نفسي أغني للربيع

واعزف قصايد فرحتي .. لحن الوجود

لكن ساعات .. نظرة عنيكى تشدني وتضمني

والقاني وسط الموج بتوه

وانده عليكي في غربتي

فيرد فيّا الصوت مفيش

والقى في قلبي م الكلام .. زلزال حروفه متلتقيش

فاضل مفيش

والعش مش ممكن يعيش فوق السما

أو يتبنى تحت التراب

وازاي نآمن حلمنا

لو يوم نحس انه سراب ؟!!

وازاي نشوف في الحلم نور

والنوم صبح مليان ضباب ؟!!

عصفور جريء

كان كل حلمه .. انك تكوني ضلته

من حرّة الظلم اللي نازل فوق كتافه ع البدن

كالسوط بيجلد فرحته

لاجل امّا يخطفها الغراب

ارمي شباكك يا ملاك

ده انا قلبي من خوفك هواك !

يا مين يصبر قلب مستنظر لقاك !

زاد العفاف علي قلبه من بعدك تقل

والحب جوه القلب زاد

طب ليه نقضي العمر في اللوم والعتاب

ده الجرح صفحة من كتاب

وبرغم إنَّك

دوستْ ع القلب اللي كان محتاج لحضنك

لسه مستني الجواب

يا شمعة لسه نفسي نورها مينطفيش

سامحيني

مش هاقدر أمد اديّا تاني ... للسراب