الموت على طرابيزه مش مدوّره !

دخان سجايرك

مش عاطيني الفرصه أعبُر

من خيالي لنبض قلبك

مش عاطيني الفرصه

ألمس ضحكتك من غير طشاش

مع كل لحظة صدق .. وصلاني سراب

راح يتولد

من روح عذاب اللي اشتكى مليون عذاب

متكتفيـن زي المرور

والدنيا عماله تدور

حركه ميوصفاش بشر غير بالجنون

مليان جنون

واحنا في دخان السجاير

زي دقة ساعة ركنه في سكون !!

الشعر فكرة أم شعور ؟!

ولمين بنكتب أو تثور ؟!

الشعر لحظة صدق أم لحظة جنون ؟!

الشعر أصله مش حقيقة أو مثالْ

الشعر كدبة مش بريئة مش خيالْ

متكتفـــين !!

ما بين جدل وما بين محالْ

الشعر يا صحبي كلام

م القلب طالع لاجل يوصل للقلوب

لازم تدوب جوه قلوب الناس وتنطق همهم

تجري في عروقهم بالكلام

تسمع بصوتك نبضهم

تلمس خيالك في انتظار

الشعر لحظة إنفجار

نبض الحقيقة في روح تكن

أو لا تكون

لكن اللي فعلا مش حقيقة

إننا .. نفضل سكون !!